በመጽሐፈ አርጋኖን ዙርያ የተዘጋጀ የግጥም መነባንብ
መጽሐፈ አርጋኖን
የጸሎት መጽሐፍ ነው ብለው ሰይመውህ
ሊያነቡህ ሊደግሙህ ደግሞም ሊጸልዩህ
የተቀመጥክ ሆነህ ተርታ ተመድበህ
እንዲህ ተደብቀህ ምነው መሰንበትህ
በውስጥህ የተጻፈ የሚደንቅ ቃል አለ
የእግዚአብሔር ቃል ሆኖ ሊሰወር ያልቻለ
አንባብያን መጡ ፈልፍለው ሊያወጡህ
ቃሉን የተረዱ ለትውልድ ሊያሳዩህ
ከእግዚአብሔር ቃል ጋራ ፍጹም የማይጋጭ
በአንተ ውስጥ ተገኘ ተጽፎ በግላጭ
አሁን በአስረጂነት ለእግዚአብሔር ቃል እውነት
ልንጠቅስህ ተነሳን እኛም ካለንበት
አንተን መጥቀሳችን አስረጂ ለቃሉ
በውስጥህ ተቀምጠው ተረት ተረት ሚሉ
ስላሉ ነው እንጂ አይደለም ለሌላ
የእግዚአብሔር ቃልማ ለሁሉም ነው ጥላ
አንተም ስትናገር እንዲህ ብለህ አልከን
ኤልያስን ከኤልሳዕ ጠቅሰህ ልታሳየን
ኤልያስ ቢያርግና ወደ ሰማይ ቢወጣም
ለራሱ ነው እንጂ ለሌሎች አይደለም
ከፍ ብሎ ወጥቶ በላይ ባረገልን
ከሞት ወደ ሕይወት ይኸው ተሻገርን
ብለህ ስትናገር ስለዚሁ ጌታ
ልባችን በቃሉ ፈጽሞ ተረታ
እኛም ምንፈልገው ይህንን ነበረ
የልብ ወለድ ድርሰት ተረት ሆኖ ያልቀረ
ተጽፎ ሊነበብ በቃሉ የሰፈረ
ይህንኑ እውነት አጽንቶ ሊያሳየን
መጽሐፈ አርጋኖን ይኸው ብቅ አለልን
መጽሐፈ አርጋኖን ጉደኛ መጽሐፍ ነው
በዚህ አላበቃም ኤልሳዕን ተረከው
ኤልሳዕ ተአምር ቢያደርግ ለምጽን ቢፈውስም
የነፍስን ለምጽ ግን
መታደግ አልቻለም
ከኃጢአት በሽታ እኛን ሊታደገን
የነፍሳችን ቤዛ ኢየሱስ መጣልን
ኃጢአት ባመጣበት የደዌ መጋኛ
ተኝቶ የቀረ የአልጋ ቁራኛ
ተነሣ ተባለ አልጋህን ተሸከም
የኃጢአትን ሥርየት ሰጠው መድኃኔዓለም
በአዲስ ማሰሮ ጨውን የጨመረ
የኢያሪኮን ውሃ ፈውሶ ያሳመረ
ነገር ግን አልቻለም የሰዎችን ሕይወት
ፍጹም ሊያጣፍጠው ጨውን ጨምሮበት
በድንገት በመሐል ሕይወት የሚያጣፍጥ
መድኃኒት ተገኘ ለሰዎች የሚሰጥ
ብሎ ተናገረ የአርጋኖን መጽሐፍ
ሳይደብቅ ሳይሰውር ለሰው ሊያትረፈርፍ
የጌታን ትንሣኤ የገድሉን ምዕራፍ
እንግዲህ ወዳጆች እንንቃ በቶሎ
ዘመን ሳይቆጠር አንድ ሁለት ብሎ
ጌታን መቀበሉ ለእኛ ይበጀናል
አዳኝ ነው ኢየሱስ ፍጹም ያዋጣናል
ጌታን መቀበሉ ለእኛ ይበጀናል
አዳኙ ኢየሱስ ፍጹም ያዋጣናል
ቀሲስ አባ ዮናስ ጌታነህ
No comments:
Post a Comment