የጫጫታው ብዛት

የጫጫታው ብዛት

 

 

 

የሰዎች መንጫጫት አረ ምን ይጠቅማል
አዬ ጉድ አዬ ጉድ እንዲያው ጉድ ይባላል 
ኑኃሚን ስትመጣ በሐዘን በምሬት 
የከተማው ሰዎች ተንጫጭተው ጮሁላት
አሉ ተናገሩ ይህቺ ኑኃሚን ናት
ለውስጥ ሐዘንዋ ግን ምላሽን የሚሰጥ
ትካዜ ልቅሶዋን ሮሮዋን ሊለውጥ
ለባዶ ነገሯም ሙላትን ለማምጣት
አንድም አልተገኘ ከምድር ፍጥረታት
እርስዋም ተናገረች በሙላት ወጣሁኝ
ጌታ እግዚአብሔር ባዶዬን መለሰኝ
ሁሉን የሚችል አምላክ በጣም አስጨነቀኝ
አዋረደኝ እንጂ መቼ አከበረኝ
ማራ በሉኝ ብቻ ኑኃሚን አትበሉኝ
ይኸው ነው ታሪኬ ሁላችሁ እወቁኝ
እንዲህ ብላ ስትል እንዲያ ስትናገር 
ሳይገለጥላት የአምላኳ ምስጢር
እግዚአብሔር ተገኘ በነገሯ መሐል
ምንም ሳይታሰብ ማንም ምንም ሳይል
በትንሽ ጀምሮ በትልቅ ጨረሰ
በሩት በምራትዋ እግዚአብሔር ደረሰ
ከቃርምያ አንስቶ በመከሩ መሐል
ማስገኘት የሚችል እግዚአብሔር ኃያል
መመስገን ጀመረ ዋርሳ ያላሳጣሽ
ሆኖ ለኑኃሚን እግዚአብሔር ደራሽ
የሕይወት ተሃድሶ ደግሞም ምግብና
ለኑኃሚን ሊሰጥ ላለች በእርጅና
ልጅን አስገኘላት ከሩት ከምራትዋ
ኑኃሚን ደስ አላት ከነጎረቤትዋ
ወገኖች በሙሉ እናስተውል በእውነት 
በሥፍራችን ሆነን የእግዚአብሔርን ሰዓት
ታማኝ ሆነን ቆመን ብንጠባበቀው
ከጫጫታው ወጥተን ደግሞም ከሁካታው
እግዚአብሔር ይመጣል ከመልሳችን ጋራ
በመማጸኛችን ባለንበት ሥፍራ 
መልስ የሚሰጥ ሆኖ በተራ በተራ
መልስ የሚሰጥ ሆኖ ሁሉንም በተራ

ወይትባረክ እግዚአብሔር አሜን

ቀሲስ አባ ዮናስ ጌታነህ