የግጥሙ ርዕስ በራእዩ መንገድ ባለ ራእዩ

የግጥሙ ርዕስ

 


በራእዩ መንገድ ባለ ራእዩ

 



በሰዎች ተከሶ በሰው ተወንጅሎ
ባለ ዕዳ ሆኖ ነገር ተመሳቅሎ
ዘመኑን ጨረሰ ዮሴፍ በስደት 
መኖርያው ሆኖለት የግብጽ ወህኒ ቤት
እግሮቹም ደከሙ በእግር ብረት
የተሸጠው ዮሴፍ ለዚያ ለባርነት
ነገር ግን እግዚአብሔር ከላይ ከጸባኦት
ለዕብራዊው ዮሴፍ አበዛለት ምሕረት
የእግዚአብሔር አሠራር ከሰዎች ይለያል
እንዳየሁ አልፈርድም አልበይንም ይላል
የሰዎችን ኑሮ ለውጦ የሚያቀና 
ልዑል እግዚአብሔር በሰማይ አለና
ዮሴፍ በእስር ቤት ፈጽሞ ተጽናና
ደግሞም ሕልም ፈቺ አደረገውና 
በታሪክ ማኅደር በሕይወት ጎዳና
የተተበተበው ተቋጥሮ በእስር 
በላይኛው ጥበብ በልዑል እግዚአብሔር
ይፈታ ጀመረ ምስጢር ሆኖ ላይቀር
ዘመኑ በእስር ቤት ያላበቃው ዮሴፍ 
ለክብር ለሹመት በንጉሡ ደጃፍ 
ይፈለግ ጀመረ ሳይውል ሳያድር
ሕልም ፈቺ ሆኖ ሊገለጥ በክብር
ሕልሞቹም ተፈቱ በተራ በተራ
ዮሴፍ ተቀመጠ በነገሥታት ጎራ
ይህንንም ሥልጣን ዮሴፍ ተቀበለ
አስተዳዳሪና መሪ ነህ ተባለ
ለግብጽ ሀገር ሁሉ በረከት የሆነ
ሕልሞችን በመፍታት እየተነተነ
ድንገት ሳያስበው ወንድሞቹን አየ
ዮሴፍም አወቀ ላፍታም አልዘገየ 
ነገር ግን አሁንም ያላወቀ መስሎ
የባዕድ ሀገር ሹም ሆኖ አድሮ ውሎ
በወንድሞቹ ፊት ራሱን ከልሎ
ይመረምር ጀመር እያጠያየቀ
በተለይ ወንድሙን ቢንያምን ናፈቀ
ልቅሶ እየመጣ ቢያጨናንቀው
በወንድሞቹ ፊት ዮሴፍን ሊገልጠው
ዮሴፍ ፈጥኖ ሄደ ወደ እልፍኙ ገባ
ፍጹም አለቀሰ አፈሰሰ እንባ
ከዚያም በመቀጠል ዮሴፍ ነኝ ለማለት
ራሱን ለመግለጥ በወንድሞቹ ፊት
እኔ ወንድማችሁ ዮሴፍ ነኝ ቢላቸው
ምሕረትን ለመኑ ከእግሮቹ ሥር ወድቀው
ታሪኩ አብቅቷል ሞቷል የተባለው 
ንቀት የጠገበ ተሰኝቶ ሕልመኛው 
ሕልሙም ሆነ ግቡ ሕልም ሆኖ አልቀረም
ፍጻሜን አግኝቶ ተሰማ ለሁሉም 
ዛሬም ለቅዱሳን እግዚአብሔር የሰጠን
በውስጣችን ያለው ራዕይ እውን ሊሆን
ጌታ መንፈስቅዱስ በእኛ ውስጥ ይተጋል
የተሰጠን ሥራ በእርሱ ይጠናቀቃል

ወስብሐት ለእግዚአብሔር

ቀሲስ አባ ዮናስ ጌታነህ