በስመ አብ ወወልድ ወመንፈስ ቅዱስ አሃዱ አምላክ አሜን!

በእንተ ሰማንያ አሃዱ (ክፍል-፯)

ንዑስ ርእስ ፪

[በመጻሕፍተ መቃብያን ለሚነሱ ትችቶች ምላሽ / ሰይጣን ለአዳም አልሰግድም በማለት ወደቀ ስለሚለው]

√ ባለፈው ባቀረብነው ጽሁፍ "ቃየን አቤልን በሴት ቀንቶ ገደለው" ተብሎ ስለ ተጻፈው የ1ኛመቃብያን ሀሳብ ተመልክተናል። በዚህ ጽሁፍ ደግሞ በ 3ኛ መቃብያን ላይ ተሃድሶ ፕሮቴስታንቶች የሚያነሱትን ትችት እንመለከታለን።

"የሚጠፉ በእኔም የሚስቱ ሰዎች ፈጽመው ይበዙ ዘንድ የአዳም ልጆች ከእኔ ጋር ይጠፉ ዘንድ በተናገሩ ጊዜ እኔ ደስ ይለኛል ለበታቼ አልሰግድም በማለቴ ስለ አባታቸው ስለ አዳም ከክብሬ ተዋርጃለሁና" ተብሎ በ 3ኛመቃ1÷15 ላይ የተጻፈውን ሀሳብ ይጠቅሱና ሰይጣን የወደቀው ለአዳም አልሰግድም በማለቱ ነውን? ብለው ይጠይቃሉ። በተጨማሪም በኢሳ14÷13-15 ከተጠቀሰው ሀሳብ ጋር ይጋጫል ይላሉ።

"አንተን በልብህ። ወደ ሰምይ ዐርጋለሁ፥ ዙፋኔንም ከእግዚአብሔር ከዋክብት በላይ ከፍ ከፍ አደርጋለሁ፥ በሰሜንም ዳርቻ በመሰብሰቢያ ተራራ ላይ እቀመጣለሁ፤ ከዳመናዎች ከፍታ በላይ ዐርጋለሁ፥ በልዑልም እመሰላለሁ አልህ።ነገር ግን ወደ ሲኦል ወደ ጕድጓዱም ጥልቅ ትወርዳለህ።" ኢሳ14÷13-15

በመጨረሻም ይህ ሀሳብ ከቁርአን የተወሰደ ነው ብለው ይደመድማሉ።

[ምላሽ]

√ የዚህ ጥያቄ ሀሳብ የመነጨው "ለአዳም አልሰግድም በማለቴ ከክብሬ ተዋርጃለው" ብሎ የተናገረውን አካል ማንነት ካለማወቅና ሙሉ የመጽሐፉን ክፍል ካላማንበብ ነው። "ለበታቼ አልሰግድም በማለቴ እግዚአብሔር ስለ አባታቸው ስለ አዳም ከክብሬ አዋርዶኛልና" ብሎ የተናገረው እራሱ ዲያቢሎስ እንጂ የመጽሐፈ መቃብያን ጸሀፊ አይደለም። ዲያቢሎስ ደግሞ ሀሰተኛ የሀሰት አባት ተብሎ የተገለጸ ነው። በትዕቢቱ መክንያት ወድቆ ሳለ ለአዳም አልሰግድም በማለቱ እግዚአብሔር እንደ ጣለው በውሸት የተናገረበት ክፍል ነው።

" እናንተ ከአባታችሁ ከዲያብሎስ ናችሁ የአባታችሁንም ምኞት ልታደርጉ ትወዳላችሁ። እርሱ ከመጀመሪያ ነፍሰ ገዳይ ነበረ፤ እውነትም በእርሱ ስለ ሌለ በእውነት አልቆመም። ሐሰትን ሲናገር ከራሱ ይናገራል፥ ሐሰተኛ የሐሰትም አባት ነውና።"

ዮሐ 8÷44

√ ይሄን ጥያቄ የሚጠይቁ ሰዎች ሙሉውን የመጽሐፈ መቃብያን ሣልስ ምእራፎች አላነበቡም ይሆንን? የሚገርመው መጽሐፈ መቃብን ሰይጣን ዲያቢሎስ የወደቀበትን እውነተኛ መክንያት ከአንድ ምእራፍ በኃላ እንዲህ በማለት ያስቀምጣል።

"ነቢዩም እንዲህ አለ አንተ ጥፉና አጥፊ በትቢትህና በልብህ ደንዳናነት ፈጣሪህን በማሳዘን ፈጣሪህንም ባላ ማመስገንህ....የፈጠረህን ፈጣሪ ነኝ በማለት በታበይህ ጊዜ በአንተ ፈንታ የሚያመሰግን አዳምን ፈጠረው" 3ኛመቃ2÷8-11

ልብ እንበል መጽሐፈ መቃብያን ሰይጣን የወደቀው በትዕቢቱ ፈጣሪ ነኝ በማለቱ እንደሆነ እና የወደቀውም አዳም ከመፈጠሩ አስቀድሞ እንደሆነ በግልጽ አስቀምጦታል።

√ በኢሳ14÷14 ላይ ዲያቢሎስ ተናገረው ተብሎ የተገለጸው ሀሳብም በዚው በመጽሐፈ መቃብያን ላይ ሰፍሮ ይገኛል። "እርሱም(ዲያቢሎስ) እንዲህ አለ:- ከእኔ በላይ ማነው? ወደ ባሕሩ ጥልቅ እገባለሁና፣ ወደ ሰማይም እወጣለሁ፣ ጥልቆችንም አያለው..." 3ኛመቃ1÷3 መጽሐፈ መቃብያንን በትንቢተ ኢሳይያስ የተጻፈውን ሀሳብ የበለጠ የሚያረጋግጥ እና የሚያብራራ ነው።

√ መጽሐፈ መቃብያን ከቁርአን ወስዶ ነው የጻፈው የሚለው ሀሳብ ያፈጠጠ ውሸት ነው። መጽሐፈ መቃብያን ከክርስቶስ ልደት በፊት የተጻፈ እንደሆነ የሚታወቅ እውነት ሆኖ ሳለ ከቁርአን ወሰደው ማለት ምን የሚሉት ነው? ቁርአን መጽሐፈ መቃብያን ከተጻፈ ከ 800 አመት በኃላ የመጣ ነው። ቁርአን በመጽሐፈ ቅዱስ የተጻፉትን እና ክርስቲያኖች የሚያምኑትን አዛብቶ በተሳሳተ መንገድ እንደሚያቀርበው በመጽሐፈ መቃብያንም ሰይጣን የተናገረውን እውነተኛ መክንያት አስመስሎ ከመጽሐፈ መቃብያን ወስዶ ጽፎ ይሆናል። ቴዎድሮስ ደመላሽ እና መሰሎቹ ግን መጽሐፈ መቃብያንን በግድ ከሌሎቹ መጻሕፍት ጋር ለማጋጨት ይጥራሉ።

እግዚአብሔር ቢፈቅድ በቀጣይ ክፍል በመጽሐፈ ሲራክ ላይ ለሚነሱ ጥያቄዎች ምላሽ እንሰጣለን።

ስብሐት ለእግዚአብሔር

ወለወላዲቱ ድንግል

ወለመስቀሉ ክቡር

©ዕቅበተ እምነት ዘኦርቶዶክስ ተዋህዶ

1616

4 Comments

4 Shares

Like

Comment

Share

 " የኢየሱስ የእግዚአብሔር ልጅነት..."

አንድ አምላክ በሚሆን በአብ ፡ በወልድ ፡ በመንፈስ ቅዱስ ስም!

ሰላም ተወዳጆች! እንደምን አላችሁ? በባለፈው ፅሁፋችን " ኢየሱስ የእግዚአብሔር ልጅነት" ዚሩያ የሚነሱ ሙግቶችን መመለክከታችን ይታወሳል። ለዛሬም ከዛው በቀጠለ ርዕስ ላይ የሚነሳን ሌላ ሙግት እንመለከታለን። የኢየሱስን የእግዚአብሔር ልጅነት በመቃዎም ወገባቸዎን ገትረው ከሚሞግቹ የሙስሊም መምህራን መካከል ሰለምቴውን ኡስታዝ ወሒድ ኡመር አንዱ ነው ለዛሬም በዚህ ርዕስ ዙሪያ እርሱ ያዘጋጀዎን ጦማር ጌታ በፈቀደ መጠን የምንፈትሽ ይሆናል። (ለፅሁፉ ርዝመት ሲባል ኡስታዙ ያነሳቸውን ዋና ዋና ነጥቦች እያነሳን የምናይ ይሆናል። ምላሹን ከማንበባችሁ በፊት ግን ለማነፃፀር እንዲመቻችሁ የኡስታዙን ፅሁፍ እንዲታነቡ እንመክራለን።https://t.me/Wahidcom/2055)

ኡስታዙ ጦማሩን በሌሎች ፅሁፎቹ እንደሚያደርገው በዚህም ፅሁፉ ላይ ከቁርአን በመጥቀስ ይጀምራል ፦

37፥152 ፦ *“አላህ ወለደ አሉ፤ እነርሱም በእርግጥ ውሸታሞች ናቸው*፡፡ وَلَدَ اللَّهُ وَإِنَّهُمْ لَكَاذِبُونَ

112፥3 *አልወለደም፤ አልተወለደምም*፡፡ لَمْ يَلِدْ وَلَمْ يُولَدْ

18፥4 *እነዚያንም፦ “አላህ ልጅን ይዟል” ያሉትን ሊያስጠነቅቅበት አወረደው*፡፡ وَيُنذِرَ الَّذِينَ قَالُوا اتَّخَذَ اللَّهُ وَلَدًا

#ምላሻችን፦ ኡስታዙ ከመፅሀፉ ለራሱ ሲጠቅስ ለራሱ የሚመቸውንና ከሃሳቡ ጋር የሚስማማለትን በመገንተል የሚያፍርባቸውን ደግሞ ወደ ጓዳ በመክተት ነው። የቁርአኑን እሳቤ ሙሉ ምስል ለማግኘች ሌላ ተጨማሪ ጥቅስን እንጥቀስ፦

ጥቅሱ የላይኞቹን ጥቅሶች እሳቤ በማስፋት ሙሉ ምስሉ እንዲመጣል የሚረዳ ቢሆንም ምስሉን ለማጥራ ያክል ከተፍሲሮቻቸው እንጨምር፦

(How can He have children when He has no wife) #for_the_child_is_the_offspring_of_two_compatible_spouses. Allah does not have an equal, none of His creatures are similar to Him, for He alone created the entire creation. Allah said;

وَقَالُواْ اتَّخَذَ الرَّحْمَـنُ وَلَداً - لَقَدْ جِئْتُمْ شَيْئاً إِدّاً

https://quranx.com/Tafsir/Kathir/6.101

ከተፍሲሩ እንምንረዳው ልጅን ለማግስገኘት ሁለት ተቃራኒ ጾታወች ያስፈልጋሉ። ጥቅሱን በአመክንዮ ስንደረድረው ለአላህ ልጅ አለመውለድ ትልቅ እንቅፋትም የሆነበት ሚስት አለማግኘቱ እንጂ አላህ ልጅን የማይወልድ ሆኖ አይደለም ሚስትን ቢያገኝ አላህ ልጅን ይወልዳል። ስለዚህ የቁርአኖቹ ጥቅሶች እንደማነፃፀሪያ ሊቀርቡ የማይችሉ ናቸው ማለት ነው።

የቁርአኑ አምላክ ልጅ ለመውለድ ሚስት የሚያስፈልገው ቢሆንም ለአምላካችን ለእግዚአብሔር ግን ይህ አይስማማውም። ልጅን ለመውለድ ሚስት እና ጊዜን የሚጠብቅ አይደለም። ከእኛ አዕምሮ በላይ በሆነ ውልደቱ ኢየሱስን ቅድም አለም ያለ እናት ወልዶታል።

ኡስታዙ፦

"እግዚአብሔር አባት መባሉ 'አስገኚ' ወይም 'ፈጣሪ' በሚል ፍካሬአዊ እሳቤ 'ideological sense' መጥቷል" በማለት ጥቅሶችን ይደረድራል ከዛም በጥቅሶቹ 'አባት' የሚለው 'አስገኚ' ወይንም ' ፈጣሪ' በሚል ፍካሬያዊ ትርጉም ስለሚተረጎም ለኢየሱስም አባት ሲባል በዛው እሳቤ የሚሄድ ነው ይለናል።

የኡስታዙ አመክንዮን ለተረዳው ሙግቱ ከአለማዊ የፍልስፍና ትምህርት እንኳን የማያልፍ ነው። በነዚያ ጥቅስ ፈጣሪ የሚል ትርጉም ስላለው ኢየሱስም በዚሁ መፈታት አለበት ብሎ መሞገት weak analogy የሚባለውን የfallacy አይነት መፈፀም ነው።

የአመክንዮውን ገለባነት በመፅሀፍ ቅዱስ ለማስደገፍ ያህል " አባት" የሚለው አስገኚነትን በሚያሳይ መልኩ እንደተገለፀ ሁሉ የሁሉ ጠባቂ መሆኑን በሚያሳይ መልኩ መገለፁን እንጥቀስ፦

“አብርሃም ባያውቀን እስራኤልም ባይገነዘበን አንተ አባታችን ነህ፤ አቤቱ፥ አንተ አባታችን ነህ፥ ስምህም ከዘላለም ታዳጊያችን ነው።”

— ኢሳይያስ 63፥16

በዚህም መሰረት ኡስታዙ ለእራሱ የሚመቸውን ጥቅስ ብቻ ጠቅሶ መፅሀፍን ለማንሸዋረር የተጠቀመበት ሂደት ስህተት መሆኑን እንረዳለን ማለት ነው።

ወሒድ፦ አዳም የእግዚአብሔር ልጅ የተባለው ያለ እናት እና ያለ አባት ስለፈጠረው እንደሆነ እሙን ነው፤ ታዲያ ያለ አባት በእናት ብቻ የተፈጠረው ኢየሱስ የእግዚአብሔር ልጅ ቢባል ምን ይደንቃል?

✟#ምላሻችን፦ ወሒድ እዚህ ላይ እኛ የማንለውን ወይንም ይዘን የማንሞግትበትን ነጥብ ይዞ ለመሞገት እየሞከረ ነው። እንደርሱ አባባል ከሆነ አኛ ኢየሱስ የእግዚአብሔር ልጅ ነው ብለን የምናምነው ከድንግል ማርያም ከተወለደ በኋላ ነው። ግን ይኼ ፈፅሞ ስህተት ነው። በባለፈው ክፍላችን እንደተመለከትነው የኢየሱስ የእግዚአብሔር ልጅነት በቅድመ አለም በነበረው ልደቱ ጀምሮ እንጂ ከድህረ አለም ልደቱ ከድንግል በተወለደው አይደለም (የቀደመውን ክፍል ማየት ለወደደ https://t.me/ekbetemnet/215)። በድህረ አለም ልደቱ እኛ ልጅ በተባልነው አይነት በጸጋ ልጅ ተብሏል ይህ ግን ቀድሞ የነበረውን ልደቱን አይቀይረውም። ኡስታዙ ይህንን እሳቤውን በፅሁፉ በተደጋጋሚ አንፀባርቆታል ይህን የተንሸዋረረ ምልከታውን የፈፀመው እያወቀ ከሆነ የሚፅፈው ለፖለቲካ ፓርቲ ሳይሆን ለዘላለማዊ ህይወት ነውና ከዚህ ነገር ይታቀብ። ያለማወቅ ከሆነ ደግሞ " ከመጠምጠም መማር ይቅደም" በሚለው ብሂል መማሩን ያስቀድም ወንድማዊ ምክራችን ነው።

ኡስታዙ፦ አይ እግዚአብሔር ኢየሱስን ወለደው ይሉናል፦

መዝሙር 2፥7 ትእዛዙን እናገራለሁ፤ *እግዚአብሔር አለኝ። አንተ ልጄ ነህ፥ እኔ ዛሬ “ወለድሁህ”*።

ዕብራውያን 1:5 ከመላእክትስ። *እግዚአብሔር አንተ ልጄ ነህ፥ እኔ ዛሬ “ወልጄሃለሁ”*፥ (አዲሱ መደበኛ ትርጉም)

ጭራሽ ይህ ጥቅስ “ዛሬ” የምትለዋ ቃል መነሻ ጊዜን ታመለክታለች፣ ይህም የኢየሱስ መፈጠር በጊዜ ውስጥ መሆኑን ያሳያል

✟ #ምላሻችን፦ ይህ መዝ 2:7 እና ዕብ 1:5 የኢየሱስን ሁለት ልደታት ልናሳይበት የምንችልበት ጥቅስ ነው። ወልድ ቅድመ አለም ያለ እናት ከአብ ተወልዷልና " አንተ ልጄ ነህ" ሲለው ድህረ አለም ከድንግል የተወለደውን ሁለተኛውን ልደት ለማሳየት ደግሞ " እኔ ዛሬ ወለድሁህ" በማለት ይገልጸዋል።

ቅዱስ ዮሐንስ አፈወርቅ ወደ ዕብራውያን መልእክትን በተረጎመበት ድርሷኑ ይኽንን ብሏል፦

Ver. 5. "For to which of the Angels said He at any time, Thou art My

Son, this day have I begotten Thee. And again, I will be to Him a

Father, and He shall be to Me a Son"? For these things indeed are

spoken with reference also to the flesh: "I will be to Him a Father,

and He shall be to Me a Son"--while this, "Thou art My Son, this day

have I begotten Thee," expresses nothing else than "from [the time]

that God is." For as He is said to be, from the time present (for this befits Him more than any other), so also the [word] "Today" seems

to me to be spoken here with reference to the flesh. For when He

hath taken hold of it, thenceforth he speaks out all boldly. For indeed

the flesh partakes of the high things, just as the Godhead of the

lowly.

ከዚህም በተጨማሪ ይህ የመዝሙር 2:7 ትንቢት የኢየሱስን ከሙታን መነሳት ጋር በተያያዘ በሐዋርያት ተገልጿል፦

“ኢየሱስንም ከሙታን በማስነሣቱ ለእነርሱ የገባውን ቃል ለእኛ ለልጆቻቸው ፈጽሞአል፤ ይኸውም በሁለተኛው መዝሙር እንዲህ ተብሎ ተጽፎአል፤ “ ‘አንተ ልጄ ነህ፤ እኔ ዛሬ ወለድሁህ።’”

— ሐዋርያት 13፥33

ኡስታዙ ከዚህ ቀጥሎ "ተራሮች ተወለዱ የሚለው መፈጠራቸውን የሚያመለክት እንደሆነ ሁሉ ኢየሱስም ወለድሁህ መባሉ መፈጠሩን የሚያመለክት ነው" በማለት ከላይ የተመለከትነውን አይነት አመክንዮአዊ ከረጅም ሀተታ ጋር ሲጠቀም እናገኘዋለን።

አሁንም ስሁት የሆነ አክንዮን እሰራ ስለሆነ እሱ የዘከዘከውን ያክል እኛም አንዘከዝክም ግን ያን ሁሉ ሀተታውን በአጭሩ ለመቋጨት ያህል ተራሮች ተወለዱ መባላቸው መፈጠራቸውን የሚያመለክት እንደሆነ እሙን ነው ማንም ተወለዱ ብሎ አይከራከርም ግን ለተራሮች የተነገረው ለኢየሱስ ይሆናል ወይ? የሚለው ነው ወሳኝ ጥያቄ ። መልሱም አይደለም የሚል ነው ምክንያቱም ተራሮች ሊወለዱ አይችሉም ኢየሱስ ግን ሊወለድ የሚችል ነው። የማይነፃፀር እያነፃፀሩ መሞገት በእውነት ቂልነት ነው።

ከላይኛው ሙግቱ በተጨማሪ፦

“የወለደህን አምላክ ተውህ፥ ያሳደገህን እግዚአብሔርን ረሳህ።”

— ዘዳግም 32፥18

ይህንን ይጠቅስና እስራኤላውያን "የወለደህ" መባሉ መፈጠራቸውን ለማመልከት ከሆነ የኢየሱስንም በዚሁ ተረዱት በማለት በማያዋጣ ሙግት ወገቡን ገትሮ ይሟገታል።

አሁንም የወለደህ መባሉ "የፈጠረኽ" የሚል ፉካሬያዊ ትርጉም አለው የሚለውን ተቀብለን ብንመለከተው ለራሱ እዚህ ላይ የፈጠረኽ በሚል ስለመጣ ብቻ ለኢየሱስም የፈጠረኽ በሚል መተርጎም አለበት ማለት አይደለም።

ወሒዴ፦ መዝሙር 110፥3 ከአንተ ጋር ቀድሞ በኃይልህ ቀን፥ በቅዱሳን ብርሃን፥ ከአጥቢያ ኮከብ አስቀድሞ ከማህጸን ወለድሁህ

የተወለደው በኃይሉ ቀን ነው፤ የቅዱሳን ብርሃን በሆነው በመንፈስ ቅዱስ ነው፤ ይህ የግሪክ ሰፕቱጀንት እንጂ የማሶሬቲኩ ላይ ቃላቱ የለም። ከማርያም ማህጸን “ወለድሁህ” ማለት “ፈጠርኩ” ማለት ካልሆነ ችግር ይፈጠራል።

✟# መልሳችን፦ ኡስታዙ መፅሀፍን በገዛ ስልጣኑ እያጣመመ መተርጎሙን ተያይዞታል። አሁን በዚህ ጥቅስ "በቅዱሳን ብርሃን" የሚለውን መንፈስ ቅዱስ ብሎ እንዲተረጉም ምን አስቻለው? በራሱ የለመደውን በመፅሀፍም ለመድገም እየቃጣው ነው።

ከዚህ ባለፈ ጥቅሱን አባቶች ሲተነትኑት ከአጥቢያ ኮኩብ የሚለው እንደሚያሳየን ቀንና ሌሊትን የሚያለዩ ብርሃናት ከመፈጠራቸው በፊት ኢየሱስ ከአብ የተወለደውን ቅድመ አለም ልደቱም የሚያሳይ ነው። ኡስታዙ እራሱ ችግር ፈጣሪ ሆኖ " ከማርያም ማህፀን 'ወለድሁህ' ማለት 'ፈጠርኹህ' ካሌሆነ ችግር ይፈጥራል ይለናል። ሲጂመርስ " ከማርያም ማህፀን" የሚለውን ከየት አመጣው? በእውነቱ ጥቅሱ ይላልን? በፍፁም አይልም። ጥቅሱ የሚለው ከማህፀን ወለድሁህ ነው። ወላጁም አብ ነው። አንዳንድ የዋሆች አምላክ ማህፀን አለው እንዴ? ብለው ሊጠይቁ ይችላሉ መልሱ ግን በሰዎኛ አገላለጽ እየገለጸው እንጂ አምላክ ዘር መቋጠሪያ ኑሮት አይደለም። በዮሀንስ 1:18 ወንጌላዊው ዮሀንስ "በአባቱ እቅፍ" ይላል እዚህ ላይ አምላክ ልጅ ማቀፊያ ጉያው ኑሮት አይደለም ግን በሰዎኛ አገላለጽ እየገለፀው ነው ያንንም በዚህ መልኩ መረዳት ይገባል።

ወሒድ ፦ ሃይማኖተ-አበው ላይ የቂሳሪያው ባስልዮስ “ወለደኝ” ማለት “ፈጠረኝ” ማለት ነው ብሎ ፍርጥ አድርጎ ነግሮናል፦

ሃይማኖተ-አበው ዘባስልዮስ ምዕራፍ 32 ቁጥር 18

ግዕዙ፦

*”ወለደኒ ይተረጎም በወልደ እግዚአብሔር ወብሂለ ፈጠረኒ በእንተ ትስብእቱ”*

ትርጉም፦

*”ወለደኝ” ማለት የእግዚአብሔር ልጅ ስለመሆኑ “ፈጠረኝ” ማለትም ሰው ስለ መሆኑ ይተረጎማል”*

ወሒድ አሁንም ፈጠራውን ቀጥላል። አሁን ደግሞ መፅሀፍን በራሱ ፍች አስቀምጦ ጨርሶ ወደ ሃይማኖተ አበው ተሸጋግሯል። ሃይማኖተ አበው ፍፁም ኦርቶዶክሳዊ የሆኑ አባቶች ያስተማሩት ትምህርት ስብስብ ሆኖ ሳለ ከዛ የእርሱን ሃሳብ የሚደግፍለትን ለመፈለግ መግባቱ አስገራሚ ነው።

ወደጠቀሰው ስንመለስ ቅዱስ ባስልዮስ በምዕራፍ 32 ከቁጥር 18 ላይ እየተናገረ ያለው ስለ ምሳሌ 8:21-24 ያለውን አርዮስ ኢየሱስ ፍጡር በማለት የካደበትን ጥቅስ እንጂ መዝሙር 110:3 ላይ ያለውን አይደለም። ይህ እንዳለ ሆን ቅዱስ ባስልዮስ ኢየሱስ ፍጡር አይደለም እያሉ መሆኑን እንኳን ወሒድ ልብ አላለም። " ፈጠረኝ ማለትም ሰው ስለ መለሆኑ ይተረጎማል" የሚለው ኢየሱስ አምላክ ሲሆን ሰው ነውና እንደሰውነቱ " ፈጠረኝ" የሚለው ይስማማዋል እያሉን ነው። ወሒድ ሃይማኖተ አበው ጠቅሶ ክርስትናን ለመሞገት ባይሞክር እና ባይደክም ይሻለዋል።

ወሒድ፦ አንዳንድ ቂሎች “መወለድ” ከአብ “መውጣት” ነው ይላሉ፤ ምነው መንፈስ ቅዱስ ከአብ የሚወጣ ነው ትሉ የለ እንዴ? ለምን መንፈስ ቅዱስን የአብ ልጅ አትሉትም? አይ “መውጣት” ማለት “መስረጽ” ነው ካላችሁ ለምንስ ወልድን ከአብ የሰረጸ ነው አትሉትም? ምክንያቱም ወልድም ከአብ የወጣ ነው ስለሚል፤ አይ መውጣት መላክ ማለት ነው ካላችሁ ጥሩ።

ወሒድ አንድ ያልተረዳው ነገር አለ። ወልድ እና መንፈስ ቅዱስ ከአብ የሚወጡ ናቸው ግን አወጣጣቸው አንድ አይደለም። ወልድ ከአብ በውልደት ሲወጣ መንፈስ ቅዱስ ደግሞ በስርጸተ ይወጣል። ስለዚህ ወልድ ከአብ ወጣ ስንል መንፈስ ቅዱስ ከአብ ወጣ ከምንለው የተለየ ነው። ወሒድ ይህንን ቢረዳ ኑሮ እንዲህ ባልተቸገረ ነበር።

ወስብሐት ለእግዚአብሔር!

ወለወላዲቱ ድንግል!

ወለመስቀሉ ክቡር!

ይቆየን!

©✞ ዕቅበተ እምነት ዘኦርቶዶክስ ተዋሕዶ

Like our page & follow us

የቴሌግራም ቻናላችንን ይቀላቀሉ

https://t.me/ekbetemnet

19የመማፀኛዬ ከተማ ኢየሱስ ነው and 18 others

7 Comments

13 Shares

Like

Comment

Share

 በስመ አብ ወወልድ ወመንፈስ ቅዱስ አሃዱ አምላክ አሜን!

[በእንተ ሰማንያ አሃዱ]

ክፍል-፰ (ንዑስ ርእስ-፪)

[በመጽሐፈ ሲራክ ለሚነሱ ትችቶች የተሰጠ ምላሽ/ ስለ ሞተ ሰው ምጽዋት መስጠትን አትተው ስለ ሚለው]

=>>> ተቃዋሚዎች "ስጦታው በሕያው ሁሉ ፊት ጸጋ አለው ስለ ሞተ ሰውም መጽዋት መስጠትን አትተው" ተብሎ በሲራክ7÷33 ላይ የተጻፈውን ሀሳብ ያነሱና ስለ ሞተ ሰው ምጽዋት ምስጠት የሚሰጠው ጥቅም የለም ብለው መጽሐፈ ሲራክን ይተቻሉ።

[ምላሽ]

√ ስለ ምጽዋት በይበልጥ በመጽሐፈ ሲራክ ይብራራ እንጂ ለሞተ ሰው መፀለይ ወይም ደግሞ ፍትሐት ማድረግና መዘከር እንዳለብን ቅዱሳት መጻሕፍት ይመሰክራሉ። ለሞተ ሰው ለሚደረጉ ተግባራት ዋናው ምክንያት የእግዚአብሔር ቸርነትና መሐሪነት ነው። ይህ ቸርነቱ በሕይወተ ሥጋ ለሌሉ (ሙታንም) ጭምር ነው።

ሩት2÷20 " ቸርነቱን በሕያዋንና በሙታን ላይ አልተወምና "

[ስለ ሞቱ ሰዎች ስለ ሚደረጉ ተግባራት መጽሐፍ ቅዱስ ምን ይላል?]

1. የያዕቆብ የበኩር ልጅ የነበረው ሮቤል በአባቱ አልጋ ላይ ወጥቶ ከባላን በመገናኘቱ አባቱ ያዕቆብ እንዲህ ብሎ ነበር።

ዘፍ49÷4 " እንደ ውኃ የምትዋልል ነህ፤ አለቅነት ለአንተ አይሁን፤ ወደ አባትህ መኝታ ወጥተሃልና፤ አረከስኸውም፤ ወደ አልጋዬም ወጣ።"

ከዚህም የተነሣ ሮቤል ከሞተ ከአመታት በኃላ እስራኤላውያን ከግብጽ ሲወጡ የአበውን ዓጽምም አብረው ይዘው ስለ ነበር በኃጢአቱ ምክንያት ከሌሎቹ አበው ዓጽም ተለይቶ የሮቤል ዓጽም ጠቁሮ ነበር። ሮቤል ከሞቱ ከብዙ ዘመን በኃላ ሙሴ እንዲህ ብሎ ጸለየለት:-

ዘዳ33÷6 " ሮቤል በህይወት ይኑር፥ አይሙት"

ለሞቱ ሰዎች ጸሎት የሚደረግ ተግባር ተገቢ ባይሆን እና ጥቅም ባይኖረው ሙሴ ለምን "በሕይወት ይኑርልኝ" ብሎ ለሮቤል ጸለየለት? ይህንን እንደ ቅዱስ ኤጲፋንዮስ ያሉ የቤተክርስቲያን አባቶች ከሞት በኋላ የሚደረግ ጸሎት እንደሚጠቅም አስረድተውበታል።

2. ቅዱስ ጳውሎስ በኤፌሶን በሐዋርያዊ ተግባር ላይ ሳለ በመልካም ላገለገለውና በኋላ ግን በሞት ለተወሰደው ሄኔሲፎሩ ለተባለው ክርስቲያን እንዲህ ብሎ ጸልዮለታል:-

2ጢሞ1÷16-18 "ጌታ ልሄኔሲፎሩ ቤተ ሰዎች ምሕረትን ይስጥ፥ ብዙ ጊዜ አሳርፎኛልና በሰንሰለቴም አላፈረበትም፥ ነገር ግን በሮሜ ባደረ ጊዜ ፈልጎ ፈልጎ አገኘኝ በዚያን ቀን ከጌታ ምሕረትን እንዲያገኝ ጌታ ይስጠው፤ በኤፌሶንም እንዴት እንዳገለገለኝ አንተ በደኅና ታውቃለህ።"

ቅዱስ ጳውሎስ ሄኒሲፎሩ በሮሜ ታስሮ ሳለ እንዲሁም በኤፌሶን ያገለገለው እንደሆነው ይገልጽና "ጌታ ለሄኒሲፎሩ ቤተሰቦች ምሕረትን ይስጥ" ሲል ለመነ። ሄኒሲፎሩ ያል ሞተ ቢሆን ኖሮ ከቤሰቦቹ ለይቶ ለእርሱ ለብቻው "በዚያን ቀን ከጌታ ምሕረትን እንዲያገኝ ጌታ ይስጠው" ብሎ ለምን ጸለየለት? በተጨማሪም በሌላ ቦታ ለሄኒሲፎሩ ቤተሰቦች ሰላምታ አቅርቡልኝ ብሎ እሱ እንደ ሌለ ይገልጻል።

2ጢሞ4÷19 " ለጵርስቅላና ለአቂላ ለሄኔሲፎሩም ቤተ ሰዎች ሰላምታ አቅርብልኝ።"

"በዚያን ቀን" የተባለው ቀንስ የቱ ነው? ብንል በዳግም ምጽአቱ በፍርድ ቀን እግዚአብሔር ምሕረትን እንዲሰጠው በሕይወተ ሥጋ ለሌለው ለሄኒሲፎሩ ቅዱስ ጳውሎስ ጸለየለት።

3. ከሞት በኋላ ይቅር ሊባል የሚችል ኃጢአት አለ።

ማቴ12÷32 " በሰው ልጅ ላይ ቃል የሚናገር ሁሉ ይሰረይለታል፤ በመንፈስ ቅዱስ ላይ ግን የሚናገር ሁሉ በዚህ ዓለም ቢሆን ወይም በሚመጣው አይሰረይለትም።"

1ዮሐ5÷16 " ማንም ወንድሙን ሞት የማይገባውን ኃጢአት ሲያደርግ ቢያየው ይለምን፥ ሞትም የማይገባውን ኃጢአት ላደረጉት ሕይወት ይሰጥለታል። ሞት የሚገባው ኃጢአት አለ፤ ስለዚያ እንዲጠይቅ አልልም።"

ኦርቶዶክሳዊት ቤተ ክርስቲያን ከሞት በኋላ ንስሐ ወይም መካነ ንስሐ (Purgatory) አለ ብላ አታምንም። ነገር ግን እግዚአብሔር ቸር ስለሆነ ፣ ከሞት በኋላ ሊሰረይ የሚችል ኃጢአት ስላለ እርሱ ባወቀ ይቅር ይላቸውና ቸርነቱን ያበዛላቸው ዘንድ እንጸልያለን።

√ ለሞተ ሰው መጸለይ ጠቃሚ ሆኖ ካኘነው በሞተ ሰው ስም ምጽዋትን ብንሰጥ ምን ያህል ይጠቅመው ይሆን? ይህንን የምናደርገው ግን አምላካችን መሀሪና ይቅርባይ መሆኑን ስለ ምናውቅና ስለ ምናምን ነው እንጂ በራሳችን በመተማመን አይደለም።

ለዚህም ነው በሐዋርያት ዘመን ለነበረችው ቤተክርስቲያን ቅርብ የነበሩት አባቶች ለሙቱ ሰዎች የሚደረጉ ተግባራትን የገለጹት።

=>>>ቅዱስ ዮሐንስ አፈ ወርቅ

"ለሞቱ ወገኖቻችን ስንል ብዙ ምጽዋትን እንስጥላቸው፣ ለመንገዳቸው በጣም ጠቃሚና መልካም የሆነ ስንቅ እንላክላቸው" [ቅዱስ ዮሐንስ አፈወርቅ፣ ትርጓሜ ወንጌለ ዮሐንስ ትምህርት 85፣ 6]

=>>>ቅዱስ ጎርጎሪዮስ ዘእንዚናዙ ሴዛርዮስ በተባለው በታላቅ ወንድሙ ሞት ምክንያት ባስተማረው ትምህርት ላይ ስለ ወንድሙ ከተናገረ በኋላ ጸሎት ይጸልያል። ከዚያም በየዓመቱ መታሰቢያውን በማድረግ በሕይወት የቀሩት በሞት የተለየውን ለያዘክሩት እንደሚገባ ይናገራል። [ቅዱስ ጎርጎሪዮስ ዘእንዚናዙ፣ ትምህርት በእንተ ዕረፍት እኃው ቁ 17]

=>>>>በ2ኛ ክ/ዘመን የነበረው ሊቁ ጠርጡለስ እንዲህ ይላል:-

"ስለ ሞቱ ሰዎች ቁርባን እናቀርባለን፣ ይህንን አሰራር ከወዴት አመጣችሁት ተብለን ብንጠየቅ የቀድሞ አባቶች የደነገጉትን የተለመደውን አሰራር ሳናቋርጥ በታማኝነት ስለ ቀጠልን ነው ብለን መልስ እንሰጣለን]

√መጽሐፈ ሲራክ በሌሎች ቅዱሳት መጻሕፍት የተጻፈውን እውነት ይመሰክራል። ስለ መጽሐፍ ቅዱስ የነገሩን አባቶችም ስለ ሞቱ ሰዎች ስለ ሚደረግ ጸሎትና ምጽዋት ይነግሩናል።

ማጣቀሻ መጻሕፍት

1.መድሎተ ጽድቅ ቅጽ-1 (ገጽ 454-476)

2. በእንተ ሰማንያ አሃዱ (ገጽ 96-99)

3. ትምህርተ መለኮት (ገጽ 282-283)

ስብሐት ለእግዚአብሔር

ወለወላዲቱ ድንግል

ወለመስቀሉ ክቡር

©ዕቅበተ እምነት ዘኦርቶዶክስ ተዋህዶ

 በስመ አብ ወወልድ ወመንፈስ ቅዱስ አሃዱ አምላክ አሜን!

[በእንተ ሰማንያ አሃዱ]

ክፍል-፱

ንዑስ ርእስ-፩

[በመጽሐፈ ኩፋሌ ላይ ለሚነሱ ትችቶች የተሰጠ ምላሽ/ የእግዚአብሔር መላእክት ተጋቡ ስለ ሚለው]

=>>> መጽሐፈ ኩፋሌን የማይቀበሉ ሰዎች በመጽሐፉ ላይ ከሚያነሱት ትችቶች አንዱ ኩፋሌ4÷9 ላይ ያለውን ሀሳብ ነው።

ኩፋ4÷9 "የአዳም ልጆች በምድር ላይ ይበዙ ዘንድ በጀመሩ ጊዜ እንዲህ ሆነ፣ ሴቶች ልጆች ተወለዱላቸው የእግዚአብሔር መላእክትም በዚህ ኢዩቤልዩና በአንዲቱ አመት እነዚህን አዩአቸው። እነዚህ ያዩአቸው መልከ መልካሞች ነበሩና ከመረጧቸው ሁሉ ሚስቶች ሊሆኗቸው ወሰዱአቸው ወንድ ልጆችንም ወለዱላቸው እነዚህም ረዓይት ናቸው"

√ ይህን የመጽሐፈ ኩፋሌ ሀሳብ ይወስዱና መላእክት እንዴት አገቡ ይባላል? መጽሐፍ ቅዱስ መላእክት መናፍስት እንደሆኑ ደግሞም እንደማያገቡ ይናገራል። ማቴ22÷30 ስለዚህ የመጽሐፈ ኩፋሌ ሀሳብ የተሳሳተ ነው ብለው ይሞግታሉ።

[ምላሽ]

√ ቴዎድሮስ ደመላሽ ና መሰሎቹ የተሃድሶ ፕሮቴስታንቶች እነርሱ የማይቀበሏቸውን መጻሕፍት ከመተቸታቸው በፊት 66ቱን መጽሐፍ ቅዱስ በሚገባ እንዲያውቁት እየጋበዝን ወደ ምላሻችን እንግባ። ከላይ በመጽሐፈ ኩፋሌ ላይ የቀረበው ታሪክ እና ሀሳብ በ 66ቱ መጽሐፍ ቅዱስ ውስጥ በሚገባ ተገልጿል። ቅዱስ ጴጥሮስ እና ቅዱስ ይሁዳ ከመጽሐፈ ኩፋሌ ወስደው በመልእክቶቻቸው ላይ አስፍረዋል። በኦሪት ዘፍጥረት ላይ [የእግዚአብሔር ልጆች] ተብለው የተጠሩት በመጽሐፈ ኩፋሌ [የእግዚአብሔር መላእክት] ተብለው ተገልጸዋል። "መላእክት" ሲል ምን ማለቱ እንደሆነ አስቀድመን እንመልከት።

=>>> መልአክ (Angel) የሚለው ቃል በመጽሐፍ ቅዱስ ሁለት የተለያየ ተፈጥሯዊ ማንነት ያላቸውን አካላት ለመግለጽ ውሏል።

1. መናፍስት የሆኑትን መልእክተኞች (ከእግዚአብሔር ዘንድ የሚላኩትን መልእክተኞች)

መዝ104÷4 " መላእክቱን መንፈስ የሚያደርግ፥ አገልጋዮቹንም የእሳት ነበልባል።"

2. ከሰው ወገን ሆነው መልአካዊ አናኗርን ገንዘቡ ያደረጉ ሰዎች ( በምስጋና፣ በጾም፣ በጸሎት፣ በንጽህና የሚኖሩ ሰዎች፣ አለቆች)

√ በዮሐንስ ራእይ ላይ እንደ ተጻፈው የሰባቱ አብያተ ክርስቲያናት አለቆች መልአክ ተብለው ተጠርተዋል።

ራእ2÷1 " በኤፌሶን ወዳለው ወደ ቤተ ክርስቲያን መልአክ (angel) እንዲህ ብለህ ጻፍ።"

√ በተጨማሪም ቅዱስ ጳውሎስ ለመንፈስ ልጁ ለጢሞቲዎስ በላከለት መልእክቱ ከሰው ወገን የሆኑትን መልአክ ብሎ ይጠራቸዋል።

1ጢሞ5÷21 " አንድን እንኳ በአድልዎ ሳታደርግ፥ እነዚህን ያለ መዘንበል እንድትጠብቅ በእግዚአብሔርና በጌታ በኢየሱስ ክርስቶስ በተመረጡትም መላእክት ፊት እመክርሃለሁ።"

√ በመጽሐፍ ቅዱስ ሰዎችም መልአክ ተብለው እንደተጠሩ ካየን ዘንዳ በመጽሐፈ ኩፋሌ ላይ የሰፈረው ሀሳብ ምን እንደሆነ እንመልከት። የእግዚአብሔር መላእክት (የእግዚአብሔር ልጆች) የተባሉት እነማን ናቸው ስንል በምናኔ ሕይውት ንጽህናን ጠብቀው ይኖሩ የነበሩት የሴት ልጆች (ዘሮች) ናቸው። በንጽህናቸው መላእክት ተብለው የተጠሩት የሴት ልጆች የተረገሙትን የቃየን ልጆችን ሲያዩ በዝሙት ጾር በመነደፋቸውና ከእነርሱ ጋር በመገናኘት ንጽህናቸውን በማጉደፋቸው ምክንያት የእግዚአብሔር መላእክት ከቃየን ልጆች ጋር ተጋቡ ብሎታል። በዚህም የቁጣ ምልክት የሆኑትን ኔፍሊሞች ወይም ረዓይታንን ወለዱ። ይህን ሀሳብ በመጽሐፈ ኩፋሌ፣ በኦሪት ዘፍጥረት፣ በቅዱስ ጴጥሮስ መልእክት እና በቅዱስ ይሁዳ መልእክት ከተጠቀሱት ሀሳቦች ጋር እያነጻጸርን እንመልከት።

=>>>መጽሐፈ ኩፋሌ

ኩፋ6÷9 "የእግዚአብሔር መላእክትም ያዩአቸው መልከ መልካሞች ነበሩና ከመረጡአቸው ሁሉ ሚስቶች ሊሆኗቸው ወሰዱአቸው ወንድ ልጆችችንም ወለዱላቸው እነዚህም ረዓይት ናቸው"

=>>> ኦሪት ዘፍጥረት

ዘፍ6÷2 " የእግዚአብሔር ልጆችም የሰውን ሴቶች ልጆች መልካሞች እንደ ሆኑ አዩ፤ ከመረጡአቸውም ሁሉ ሚስቶችን ለራሳቸው ወሰዱ።"

√ በኦሪት ዘፍጥረት እና በመጽሐፈ ኩፋሌ መካከል ያለው ልዩነት የእግዚአብሔር ልጆች የሚለውና የእግዚአብሔር መላእክት የሚለው ብቻ ሲሆን ሌላው ሀሳብ ሙሉ ለሙሉ አንድ ነው። ኦሪት ዘፍጥረት የእግዚአብሔር ልጆች የሚላቸውን በቅዱስ ጴጥሮስና በቅዱስ ይሁዳ መልእክታት ደግሞ እንደ መጽሐፈ ኩፋሌ መላእክት ተብለው እንደተጠሩ ከመጽሐፈ ኩፋሌ ጋር በማነጻጸር እንይ።

=>>>መጽሐፈ ኩፋሌ

ኩፋ6÷11-12 "እርሱም ሰውንና በምድር ላይ የፈጠረውን የሥጋ ወገንን ሁሉ አጠፋዋለው አለ፣ ኖኀ ብቻ በእግዚአብሔር ፊት ባለሟልነትን አገኘ"

ኩፋ6÷16 "ከዚህ በኋላ መንገዳቸውን ባፈለሱ መላእክት ሁሉ ላይ ፍርድ ሊሆን እስከ ታላቋ የፍርድ ቀን ድረስ በምድር ጥልቅ ውስጥ ተጋዙ"

=>>>ከቅዱስ ጴጥሮስ መልእክት

2ጴጥ2÷4-5 " እግዚአብሔር ኃጢአትን ላደረጉ መላእክት ሳይራራላቸው ወደ ገሃነም ጥሎ በጨለማ ጉድጓድ ለፍርድ ሊጠበቁ አሳልፎ ከሰጣቸው ለቀደመውም ዓለም ሳይራራ ከሌሎች ሰባት ጋር ጽድቅን የሚሰብከውን ኖኅን አድኖ በኃጢአተኞች ዓለም ላይ የጥፋትን ውኃ ካወረደ...."

=>>>ከቅዱስ ይሁዳ መልእክት

ይሁ1÷6-7 "መኖሪያቸውንም የተዉትን እንጂ የራሳቸውን አለቅነት ያልጠበቁትን መላእክት በዘላለም እስራት ከጨለማ በታች እስከ ታላቁ ቀን ፍርድ ድረስ ጠብቆአቸዋል። እንዲሁም እንደ እነርሱ ዝሙትን ያደረጉና ሌላን ሥጋ የተከተሉ ሰዶምና ገሞራ በዙሪያቸውም የነበሩ ከተማዎች በዘላለም እሳት እየተቀጡ ምሳሌ ሆነዋል።"

√ እንግዲህ በጥቅሶቹ በግልጽ እንደ ተቀመጠው መላእክት ተብለው የተጠሩ ሰዎች በዝሙት ምክንያት ኃጢአት አድርገው እስከ ታላቋ የፍርድ ቀን ድረስ ለፍርድ ወደ ጨለማ ተግዘዋል። ኖኅ ብቻ ጻድቅ ሆኖ ተገኝቶ ተርፏል። ይህ ደግሞ መቶ በመቶ በመጽሐፈ ኩፋሌ ከተገለጸው ጋር አንድ ነው። መጽሐፈ ኩፋሌን የሚተቹ ሰዎች አስቀድመው 66ቱ መጽሐፍ ቅዱስን በደንብ እንዲያጠኑ እንመክራለን። እንዲያውም ቅዱስ ጴጥሮስና ቅዱስ ይሁዳ ከመጽሐፈ ኩፋሌ መጥቀሳቻው ለመጽሐፉ ተዓማኒነት የሚሰጥ ነው።

ስብሐት ለእግዚአብሔር

ወለወላዲቱ ድንግል

ወለመስቀሉ ክቡር!

©ዕቅበተ እምነት ዘኦርቶዶክስ ተዋህዶ

66